الكارو وبنت البلد مع بيرم التونسي

(الكارو)

الكارو طول عمرها جالبه علينا العار
والكل ساخطين عليها من كبار وصغار
والكل عايزينها تتكسر في جورة نار
لإمتى فاضله يا كارو تجري بالمشوار
ولإ نرقع عليكي بالطبول والطار
واللوم على اللى ركب ولا على الحمار
صبحت طرود الخضار من قرنبيط وخيار
يشيلها لورى تسوقه كهربا وبخار
ومين بعين الرضي يتظر لدى الاقذار
الشعب ولا الوزير ولا انت يا حكمدار

( احب بنت البلد )

احب بنت البلد ، والحب بهــــــــــدلنى
ومن يروج الادب والفن نــــزلــــنـــى
أحب عــــوجــة ، لــئــيـمــة ، اشتكى لله
من غلبى منها ، وتشكى غلبها منى !
***
جاهلة .. . إذا اتفرجت فى جنينة الحيوان
تقول على النمر قطه والوعول خرفان!
وتقول على البنك سيما والبلوز فستان
لكن يصيبنى البكم لما تجادلنى!
***
جبانة... تصرخ من النملة بعزم الصوت
والبرص... يطلع عليها عزرائيل الموت
لكن يفوت رمش عينها فى فؤادى فوت
إن كنت ميت قتيل هوه اللى قاتلنى!
***
راكبه على الكارو تتسامر مع الحمار
والشمس فوق جسمهــــــا تشعل وتقدح نار
ولما يوم ينتظرها ابن الذوات ببكــــــــــــــار
تقــــول له روح على امك وابقى قـــــــابلنى!
***
احب بنت البلد من فرط خفتها
هوليوود على بدعها ما تجيبش عصبتها
ولا بنات لندره تتلف لفـــــتــــــــــهــــــــــــا
آدى اللى جاب لى البـلا... آدى اللى هابلنى